ارمغان مورخ اہل حدیث مولانا محمد اسحاق بھٹی

کہ جدوں اپنی ماموں کانجن وچ کانفرنس دے موقعے تے ملاقات ہوئی سی او کیہڑا سن سی؟۔

بقول اوناں دے اکتوبر ۱۹۷۹ء سی گا۔ کیونکہ راقم اوس ویلے پندرہ سالاں دا ای سی، تے اک دوست عبدالرؤف مرحوم دے نال ماموں کانجن ضلع فیصل آباد گیا، تے اوتھے مولانا یٰسین شاد دے علاوہ حاجی گل محمد مرحوم وی ملے سن۔

راقم دے والد محترم رحمہ اللہ مولانا شہاب الدین زیروی رحمہ اللہ ادارے دی دعوت تے پہلے ای موجود سن، والد محترم وی جماعت اہلِ حدیث دے بڑے عالم تے پنجابی ادب دے شاعر سن، اپنے وقت وچ ماشاء اللہ وڈا نام کمایا، تے راقم نوں اوتھے ویکھ کے بہت خوش ہوئے، تے نال لے کے کتاباں دے سٹال تے گئے، مختلف کتاباں ویکھدے پئے سن، کہ ایسے دوران اک ایسی شخصیت، جیدا بعد وچ پتا چلیا کہ جماعت دے بہت وڈے عالم، دانشور، لکھاری تے مدیر اعلیٰ مولانا محمد اسحاق بھٹی رحمہ اللہ نے۔

او والد مرحوم نوں بڑے پر تپاک طریقے نال ملے، تے فیر راقم دا تعارف کرایا، تے خوش ہو کے آپنے سینے نال لا لیا، بہت دعاواں دِتیاں ، تے فیر مرحوم، والد صاحب رحمہ اللہ دے نال، حالات حاضرہ دے موضوع تے بڑی دیر تک گل بات کردے رئے۔ اونہاں دا خلوص اج تِکر یاد کرناں وا، تے وڈا ای لطف اوندا اے۔ اوناں دیاں گلاں سن کے تے میں وڈا ای متاثر ہو یا کیونکہ شروع دن دے نال علمی شخصیت نال مل کے تے بہت ای خوشی ہوندی اے، تے او لوگ دنیاتے بڑے خوش قسمت نیں جیہڑے اونہاں لوکاں توں فیض یاب ہوندے نے۔

راقم نوں ساری زندگی اے افسوس رہوے گا کہ اونہاں دے نال، ایہہ پہلی تے آخری ملاقات ثابت ہوئی۔ اوناں دے بارے وچ والد مرحوم نے لکھیا اے کہ

عالم طبیب باقی لوگ بیمار نے خیر دے طالب سداں لیل ونہار نے

محنت بغیر لوکاں وی خدمت گزار نے عالم دی موت گویا موت سنسار دی

جھوک وسیندی سوہنے عبدالجبار دی

راقم نے ٹُٹے پھُٹے الفاظاں نال اک عظیم شخصیت دی وفات تے چند گلّاں لکھ کے، اونہاں دی شخصیت نوں خراجِ تحسین پیش کرن دی کوشش کیتی اے۔ دعا اے کہ اللہ تعالیٰ راقم دی حقیر جئی کوشش نوں قبول کرکے مرحوم دے درجات ودھاوے، اللہ تعالیٰ اونہاں نوں جنت الفردوس وچ اُچا مقام دیوے، تے پسماندگان نوں صبر جمیل نال نوازے۔ آمین۔

٭٭٭