تحفۃ المتقین

(5): باب :میت کی آنکھیں بند کرتے وقت کی دعا

324۔حضرت ام سلمہ رضی اللہ عنہا فرماتے ہیں :

’’ رسول اللہ صلی اللہ علیہ وسلم ابوسلمہ کے پاس تشریف لائے تو ابوسلمہ کی آنکھیں کھلی ہوئی تھیں ۔آپ صلی اللہ علیہ وسلم نے ان کو بند کردیا، پھر فرمایا :’’جب روح قبض کی جاتی ہے تو نگاہ بھی اس کے پیچھے جاتی ہے۔‘‘

ان کے گھر کے لوگوں نے رونا شروع کردیا؛ تو آپ صلی اللہ علیہ وسلم نے فرمایا :

’’ اپنے آپ پر خیر ہی کی دعا کیا کرو بےشک فرشتے تمہاری بات پر آمین کہتے ہیں ۔ ‘‘ پھر فرمایا:

(( اللّٰهُمَّ اغْفِرْ لِأَبِي سَلَمَةَ، وَارْفَعْ دَرَجَتَهُ فِي المَهْدِيِّينَ، وَاخْلُفْهُ فِي عَقِبِهِ فِي الغَابِرِينَ، وَاغْفِرْ لَنَا وَلَهُ يَا رَبَّ العَالَمِينَ، وَافْسَحْ لَهُ فِي قَبْرِهِ، وَنَوِّرْ لَهُ فِيه))

’’یااللہ ابوسلمہ کو معاف فرما اور ہدایت یافتہ لوگوں میں اس کا درجہ بلند فرما اور باقی لوگوں میں سے اس کا جانشین مقرر فرما؛یا رب العالمین! ہمیں اور اس کو بخش دے اور اس کی قبر میں اس کے لئے کشادگی فرما اور اس میں اس کے لئے روشنی فرما۔‘‘

[صحيح: رواه مسلم في الجنائز (920).]

(6): باب :مصیبت کے وقت کیا کہیں

اس میں اصل اللہ تعالیٰ کا یہ فرمان گرامی ہے:

﴿الَّذِيْنَ اِذَآ اَصَابَتْہُمْ مُّصِيْبَۃٌ۝۰ۙ قَالُوْٓا اِنَّا لِلہِ وَاِنَّآ اِلَيْہِ رٰجِعُوْنَ۝۱۵۶ۭ اُولٰۗىِٕكَ عَلَيْہِمْ صَلَوٰتٌ مِّنْ رَّبِّہِمْ وَرَحْمَۃٌ۝۰ۣ وَاُولٰۗىِٕكَ ھُمُ الْمُہْتَدُوْنَ ۝۱۵۷ ﴾ [ البقرة: 156-157].