سیدنا حسین بن علی رضی اللہ عنہما شخصیت اور کارنامے

زہری کہتے ہیں : ’’میں نے علی بن حسین رحمہ اللہ سے زیادہ افضل ہاشمی نہیں دیکھا۔‘‘[1]

محمد بن سعد کہتے ہیں : ’’علی بن حسین رحمہ اللہ ثقہ، مامون، کثیر الحدیث، بلند مرتبہ اور متقی و پرہیز گار تھے۔‘‘[2]

۵۔ محمد بن علی (الباقر) رحمہ اللہ :

ابن سعد کہتے ہیں : ’’بے پناہ علم اور حدیث کے مالک تھے۔‘‘[3] صفدی بیان کرتے ہیں : ’’علم، فقہ اور عبادت کو جمع کرنے والوں میں سے ایک تھے۔‘‘[4]

علماء کا اس بات پر اتفاق ہے کہ ان سے حجت پکڑنا صحیح ہے جیسا کہ ذہبی نے اس پر نص ذکر کی ہے۔[5]

۶۔ جعفر بن محمد (الصادق) رحمہ اللہ :

امام ابو حنیفہ رحمہ اللہ ان کے بارے میں فرماتے ہیں : ’’میں نے جعفر بن محمد سے بڑا فقیہ نہیں دیکھا۔‘‘[6]

ابو حاتم بیان کرتے ہیں : ’’ثقہ ہیں ، ان جیسے کے بارے میں پوچھا نہیں جاتا (کہ وہ ثقہ ہی ہوتے ہیں )۔‘‘ [7]

ذہبی کہتے ہیں :’’جعفر بن محمد الصادق اپنے زمانہ میں علویوں کے سردار اور حجاز کے امام تھے۔ ان کی صحابہ رضی اللہ عنہم سے ملاقات ثابت نہیں ۔‘‘[8]

۷۔ موسی بن جعفر (الکاظم) رحمہ اللہ :

ابو حاتم رازی ان کے بارے میں کہتے ہیں : ’’ثقہ، صدوق اور ائمہ مسلمین میں سے ہیں ۔‘‘[9]

شیخ الاسلام ابن تیمیہ رحمہ اللہ فرماتے ہیں : ’’موسی بن جعفر کاظم کی عبادت و ریاضت مشہور تھی۔‘‘[10] ذہبی کہتے ہیں : موسیٰ نہایت بلند مرتبہ حکیم اور متقی و پرہیزگار تھے۔ [11]

۸۔ علی بن موسیٰ(الرضا) رحمہ اللہ :

ذہبی کہتے ہیں : ’’علم و عبادت اور قیادت و سیادت میں ایک مرتبہ رکھتے تھے۔‘‘ [12]