|
اس روایت میں اس امر کی تصریح نہیں ہے کہ یہ مسائل حضرت علی کو آنحضرت صلی اللہ علیہ وسلم نے لکھوائے تھے یا آپ نے خود اپنی یادداشت کے لئے لکھ رکھے تھے۔ لیکن حضرت جابر کی مندرجہ ذیل حدیث سے معلوم ہوتا ہے کہ یہ مسائل آپ کو آنحضرت صلی اللہ علیہ وسلم نے لکھوائے تھے۔
عن جابر بن عبداللّٰہ قال کتب النبی صلی اللّٰہ علیہ و سلم علی کل بطن عقولہ ثم کتب انہ لایحل لمسلم ان یتوالی مولے رجل مسلم بغیرہ اذنہ ثم اخبرت انہ لعن فی صحیفتہ من فعل ذالک۔[1]
’’یعنی حضرت جابر کہتے ہیں کہ آنحضرت صلی اللہ علیہ وسلم نے لکھوایا کہ ہر بطن کی دیت اس کے اپنے ذمہ ہے۔ پھر یہ بھی لکھوایا کہ کسی مسلمان کو حلال نہیں کہ دوسرے مسلمان کے آزاد کردہ غلام کا خود بخود مالک بن بیٹھے۔ پھر مجھے (حضرت جابر کہتے ہیں ) یہ بھی خبر دی گئی کہ آپ نے (اس) صحیفے میں ایسا کرنے والے پر لعنت بھی ذکر کی ہے۔‘‘
|