شرح ارکان ایمان

فصل سوم فرشتوں کی صفات پر ایمان لانا

فرشتوں کی صفات عموماً دو طرح کی ہوتی ہیں۔

الف۔ صفات خَلقْی (پیدائشی)

ب۔ صفات خُلقْی(اخلاقی و فطری)

ہم نہایت ہی اختصار کے ساتھ فرشتوں کی دونوں طرح کی صفات میں سے کچھ قارئین کے سامنے سپرد قلم کریں گے۔

الف۔ فرشتوں کی صفات خَلقی (پیدائشی) کا بیان:

خلق و پیدائش کے اعتبار سے بھی فرشتوں کی بہت سی صفات ہیں جن میں سے کچھ حسب ذیل ہیں۔

۱۔ مادہ تخلیق :

مادہ تخلیق کا مطلب یہ ہے کہ فرشتے کس چیز سے پیدا کئے گئے ہیں ؟ سو معلوم ہونا چاہئے کہ اﷲ تعالیٰ نے فرشتوں کو نور (روشنی) سے پیدا کیا ہے۔ اس لئے ان کی خلقت و پیدائش نورانی ہے چنانچہ حدیث میں اسی طرح آیا ہے۔

عن عائشۃ قالت قال رسول اللّٰہ صلی اللّٰہ علیہ وسلم ’’خلقت الملائکۃ من نور و خلق الجان من مارج من نار و خلق آدم مما وصف لکم [1]

فرمایا: ملائکہ نور سے پیدا کئے گئے ہیں اور جنات آگ کے بھڑکتے ہوئے شعلوں سے اور آدم کی تخلیق کے بارے میں تفصیل تمہارے سامنے بیان کردی گئی ہے۔