|
( (أَنْتَ أَنَسُ بْنُ مَالِکٍ))
’’تم انس بن مالک ہو۔‘‘
انس بن مالک نے جواب دیا: ہاں ۔
حجاج نے کہا: ( (أَنْتَ الَّذِیْ تَدْعُوْ عَلَیْنَا وَ تَسُبُّـنَا)) ’’آپ وہی ہیں جو مجھے گالیاں دیتے ہیں اور میرے لیے بددعا کرتے ہیں ۔‘‘
انس بن مالک: ہاں ۔
حجاج: آخر اس کی وجہ کیا ہے؟
انس بن مالک: ( (لِأَنَّکَ عَاصٍ لِرَبِّکَ مُخَالِفٌ لِسُنَّۃِ نَبِیِّکَ صلی اللّٰہ علیہ وسلم وَ تُعِزُّ أَعْدَائَ اللّٰہِ وَ تُذِلُّ أَوْلِیَائَ اللّٰہِ)) ’’کیونکہ تم اللہ کی نافرمانی کرتے ہو۔ اللہ کے رسول کی مخالفت کرتے ہو۔ تم دشمنان اسلام کو تو عزت و احترام دیتے ہو مگر اولیاء اللہ کو رسوا کرتے ہو۔‘‘
حجاج غصے میں آ گیا اور کہنے لگا: آپ کو معلوم ہے کہ میں آپ کے ساتھ کیا سلوک کرنے والا ہوں ؟
انہوں نے فرمایا: مجھے تو معلوم نہیں ۔
حجاج نے کہا: میں آپ کو نہایت برے طریقے سے قتل کر دوں گا۔
حضرت انس نے اس وقت یہ تاریخی کلمات ارشاد کیے:
( (لَوْ عَلِمْتُ أَنَّ ذٰلِکَ بِیَدِکَ لَعَبَدْتُّکَ مِنْ دُوْنِ اللّٰہِ))
’’اگر مجھے معلوم ہوتا کہ موت و زندگی تمہارے ہاتھ میں ہے تو میں اللہ کو چھوڑ کر تمہاری پوجا کرتا۔‘‘
حجاج نے کہا: ایسا میرے بس میں کیوں نہیں ہے؟
حضرت انس نے فرمایا: اللہ کے رسول صلی اللہ علیہ وسلم نے مجھے ایک ایسی دعا سکھائی ہے کہ جو شخص اس دعا کو ہر روز صبح کے وقت پڑھے گا ( (لَمْ یَکُنْ لِأَحَدٍ عَلَیْہِ سَبِیْلٌ)) ’’کوئی اس پر غلبہ نہ پا سکے گا۔‘‘ اور آج صبح میں نے یہ دعا پڑھی ہے۔
|