علامہ ابن باز یادوں کے سفر میں

شیخ عبدالعزیزبن باز رحمہ اللہ ، ایک مرد مجاہد

(از:....ڈاکٹر صہیب حسن[1]؍امیرجمعیت اہل حدیث، لندن)

دنیا میں رجال (مردوں ) کی کمی نہیں ہے، لیکن قرآن نے رجال کے لفظ سے خاص صفات کے حامل افراد لیے ہیں، فرمایا ’’مومنوں میں سے کچھ ایسے لوگ ہیں کہ انہوں نے اللہ سے جو عہد کیا تھا اسے سچا کر دکھایا، ان میں سے کوئی تو اپنی عمر پوری کر چکا اور کوئی انتظار میں ہے اور انہوں نے اپنے عہد میں کوئی تبدیلی نہیں کی۔‘‘ (الاحزاب:23) اسی طرح بیوت اللہ کے آباد کرنے والوں کے تذکرہ میں ارشاد فرمایا: ’’ان میں صبح وشام وہ اللہ کی تسبیح کرتے ہیں جنہیں اللہ کے ذکر، اقامت صلاۃ اور ادائے زکوٰۃ سے نہ تجارت غافل کرتی ہے اور نہ خرید وفروخت، وہ اس دن سے ڈر تے رہتے ہیں، جس میں دل اور آنکھیں الٹ جائیں گی۔‘‘ (النور:36۔37) یقینا ہمارے استاذ ومربی سماحۃ الشیخ عبدالعزیز بن باز انہی امتیاز کے حامل رجال میں سے تھے کہ جن کے وجود سے اسلاف کی یاد تازہ ہوتی تھی اور جن کی ہمہ گیر اور بھر پور زندگی بہتوں کے لیے مشعل راہ بنی رہے گی۔