اگراحناف قول علی رضی الله عنہ پر اڑ ے تھے اچھی طرح اڑتے۔ اور شہر چھوڑ، ہر دیہات میں چھوٹا ہو خواہ بڑا، نمازِ جمعہ ناجائز بتاتے تو بھی خیر ایک بات تھی۔ مگر حیرت تو یہ ہے کہ ان حضرات نے مصر کی بہت سی تعریفیں گھڑیں۔ جن کو نہ لغت سے کچھ تعلق ہے اور نہ قرآن وسنت سے کچھ لگاؤ۔ کسی نے مصر کے معنے کا دائرہ اس قدر وسیع کیا کہ بہت سے دیہات کو بھی حد مصر کے اندر لے لیا اور ان میں نمازِ جمعہ کو واجب بتایا اور کسی نے اتنا تنگ کیا کہ بہت سے شہروں کو بھی حد مصر سے خارج کر کے ان میں نمازِ جمعہ کو ناجائز ٹھہرایا۔ لیجئے قول علی رضی الله عنہ پر بھی پورا عمل نہ ہوا۔ پھر طرہ یہ کہ ان تعریفوں میں باہم ایسا اختلاف کہ الامان ۔ دنیا بھر میں بہت ہی تھوڑے ایسے شہر نکلیں گے ،جن میں مصر کی کل مختلف تعریفیں صادق آئیں۔ اور جن میں باتفاق فقہاء نمازِ جمعہ بلا شک و شبہ جائز ہو ایسے ہی اکثر شہر نکلیں گے جن کا مصر ہونا اور ان میں نمازِ جمعہ کا ہونا مشکوک ومشتبہ ہے ۔ حتیٰ کہ عند الاحناف مکہ اور مدینہ (جہاں آنحضرت صلی اللہ علیہ وسلم نے عمر بھر نمازِ جمعہ پڑھی ہے) کے مصر ہونے اور ان دونوں متبرک مقاموں میں بھی نمازِ جمعہ کے جائز ہونے میں شک اور تردد ہے۔ مرقاۃ شرح مشکوٰۃ میں ملاعلی قاری رحمۃ اللہ علیہ فرماتے ہیں۔ واختلفوا فی حد المصر اختلاف کثیر اقل ما یتفق وقوعہ فی بلد ولا تغتر بقول من قال ان کلامن الحرمین الشریفین مصر لصلٰوتہ علیہ الصلوۃ والسلام فیھما لان الا وصاف تختلف باختلاف الا وقات الخ ۔ پھر طرہ پر طرہ یہ ہے کہ اسی شک و شبہ کی وجہ سے فقہائے متاخرین نے ایک نماز ایجاد کی۔ اور ظہر احتیاطی نام رکھااور اس نماز محدث کا ان مقامات میں پڑھنا واجب بتایا۔ جو بعض حدود کے رو سے مصر ہیں اور بعض کے اعتبار سے نہیں۔ تا اگر نمازِ جمعہ صحیح نہ ہوئی تو یہ احتیاطی ظہر کا کام دے گی واِلاَّ نفل ہو جائے گے۔ اس بدعت ومحدث فی الدین پر اگر چہ خود بعض فقہاء نے سخت انکار کیا ہے۔ تاہم بہت مقاموں میں اس بدعت پر عمل کرنا ضروری سمجھا جاتا ہے۔ {فاعتبروا یا اولی الابصار} |
Book Name | مقالات محدث مبارکپوری |
Writer | الشیخ عبدالرحمٰن مبارکپوری |
Publisher | ادارہ علوم اثریہ |
Publish Year | |
Translator | |
Volume | |
Number of Pages | 277 |
Introduction | مولانا محمد عبدالرحمٰن مبارکپوری شیخ الکل فی الکل میاں سید نذیر حسین محدث دہلوی کے چند مامور شاگردوں میں سے ایک ہیں ۔آپ اپنے وقت کےبہت بڑے محدث،مفسر، محقق، مدرس ، مفتی،ادیب اور نقاد تھے ۔ اللہ تعالیٰ نے انہیں علم کی غیر معمولی بصیرت وبصارت،نظر وفکرکی گہرائی ،تحقیق وتنقیح میں باریک بینی اور ژرف نگاہی عطاء فرمائی تھی ۔زہد وتقوی ،اخلاص وللّٰہیت،حسن عمل اور حسن اخلاق کے پیکر تھے۔یہ ایک حقیقت ہےکہ’’برصغیر پاک وہند میں علم حدیث‘‘ کی تاریخ تب تلک مکمل نہیں ہوتی جب تک اس میں مولانا عبدالرحمٰن محدث مبارکپوری کی خدمات اور ان کا تذکرہ نہ ہو۔جامع الترمذی کی شرح تحفۃ الاحوذی ان ہی کی تصنیف ہے۔ زیر تبصرہ کتاب’’مقالات محدث مبارکپوری ‘‘ مولانا محمد عبد الرحمٰن مبارکپوری کی نایاب تصانیف کا مجموعہ ہے ۔اس میں مولانامبارکپوری مرحوم کی آٹھ تصانیف کے علاوہ ان نادر مکتوبات اور شیخ الھلالی کا وہ قصیدہ جو انہوں نے حضرت مبارکپوری کےمحامد ومناقب میں لکھا شامل اشاعت ہے۔ |