Maktaba Wahhabi

363 - 645

[جواب]:وہ لوگ جنہوں نے نبی کریم صلی اللہ علیہ وسلم سے قولاً و فعلاً وضوء نقل کیا‘ اور آپ صلی اللہ علیہ وسلم سے وضوء کرنے کاطریقہ سیکھا ‘ اور آپ کے عہد مبارک میں وضوء کرتے رہے اور رسول اللہ صلی اللہ علیہ وسلم انہیں اس طرح کرتے ہوئے دیکھتے اور پھر اس فعل پر برقرار رکھتے ؛ اور انہوں نے اپنے بعد والوں کے لیے یہ طریقہ نقل کیا ؛ ان کی تعداد ان سے بہت زیادہ ہے جنہوں نے اس آیت کا یہ معنی ان الفاظ میں نقل کیا ہے۔ اس لیے کہ سبھی مسلمان رسول اللہ صلی اللہ علیہ وسلم کے عہد مبارک میں وضوء کیا کرتے تھے۔اور انہوں نے وضوء کرنا طریقہ بھی رسول اللہ صلی اللہ علیہ وسلم سے ہی سیکھا تھا؛ اس لیے کہ عہد جاہلیت میں وضوء نام کی کوئی چیز نہیں تھی۔ اور خود نبی کریم صلی اللہ علیہ وسلم کو وضوء کرتے ہوئے اتنے لوگوں نے دیکھا ہے کہ جن کی صحیح تعداد کو صرف اللہ ہی جانتا ہے ؛ ان لوگوں سے مروی تمام احادیث میں پاؤں کو دھونے کا ذکر آیا ہے۔ یہاں تک کہ صحاح اور دوسری کتب احادیث میں کئی ایک اسناد سے رسول اللہ صلی اللہ علیہ وسلم سے روایت نقل کی گئی ہے کہ آپ نے فرمایا: ((ویل لِلأعقابِ وبطون الأقدام مِن النارِ )) [1] ’’ایڑیوں اور پاؤں کی ہتھیلیوں کے لئے آگ سے تباہی ہو گی۔‘‘ ٭ اگر پاؤں پر صرف مسح کرنے کا حکم ہوتا تو ظاہری پاؤں پرمسح کرلینا کافی تھا؛ اور تمام پاؤں کو دھونا ایک ایسا تکلف ہوتا جسے طبیعت جلدی سے تسلیم نہ کرتی۔ جیساکہ طبیعت میں مال و جاہ کی طلب ہوتی ہے۔ ٭ اگریہ کہا جائے کہ : ان لوگوں نے جھوٹ بولا ہے ‘ یا پھر وضوء کا طریقہ نقل کرنے میں ان سے غلطی ہوگئی ہے تو یہی جھوٹ یا غلطی کا احتمال فرد واحد کی روایت میں اس سے بڑھ کر ہے۔ ٭ اگر یہ کہا جائے کہ : نہیں ‘ بلکہ آیت کا لفظ تواتر کے ساتھ ثابت ہے جس میں غلطی کا احتمال و امکان نہیں ۔ ٭ تو اس کا جواب یہ ہے کہ : وضوء کا طریقہ بھی اسی طرح نقل متواتر کے ساتھ ثابت ہے۔اور آیت کے الفاظ کا ثابت شدہ سنت کے ساتھ کوئی اختلاف نہیں ۔اس لیے کہ لفظ مسح دو جنس کو شامل ہے: ۱۔ اسالہ [پانی بہانا] ۲۔غیر اسالہ[صرف ہاتھ پھیرنا]