سیدنا علی بن ابی طالب رضی اللہ عنہ شخصیت اور کارنامے

(3) قرآن اور سیّدنا علی رضی اللہ عنہ کی زندگی پر اس کے اثرات

اللہ کی ذات، کائنات، زندگی، جنت، جہنم اور قضاء و قدر کے بارے میں سیّدنا علی رضی اللہ عنہ کا تصور:

سیّدنا علی رضی اللہ عنہ نے بھی دیگر خلفائے راشدین اور صحابہ کرام رضی اللہ عنہم کی طرح قرآنی خطوط اطوار پر ترتیب پائی تھی اور نبی اکرم صلی اللہ علیہ وسلم آپ کے مربی تھے، آپ صلی اللہ علیہ وسلم ہمیشہ یہ باور کرانے کے لیے کوشاں رہے کہ شریعت اسلامی کا منبع و مصدر صرف ایک ہے اور قرآن و سنت ہی نظام زندگی کا اساسی منہج ہونا چاہیے۔

چنانچہ اس دور کے مسلم افراد، خاندان اور جماعتوں نے عقائد، عبادات، معاملات اور اخلاقیات وغیرہ میں کتاب اللہ اور سنت رسول صلی اللہ علیہ وسلم کے مطابق تربیت پائی، علی رضی اللہ عنہ نے زبان رسالت سے جن قرآنی آیات کو سنا، انھوں نے آپ کی اسلامی شخصیت کو نکھارنے اور سنوارنے میں بہت اہم کردار ادا کیا، آپ کے دل کو پاکی، نفس کو للہیت، عقل کو روشنی اور روح کو تازگی ملی اور آپ اپنے اعلیٰ اقدار، بلند احساسات، عظیم مقاصد اور مثالی سلوک کے ساتھ ایک نئے انسان کی شکل میں ابھرے۔[1]

سیّدنا علی رضی اللہ عنہ نے قرآنی آیات اور تربیت نبوی کے ذریعہ سے اچھی طرح جان لیا کہ وہ حقیقی معبود کون ہوسکتا ہے، جس کی عبادت کرنا چاہیے اور نبی صلی اللہ علیہ وسلم کی تربیت بھی ایسی تھی کہ قرآنی آیات کی عظمت و معانی کو خوب اچھی طرح ان کے دل و دماغ میں بٹھانے کی کوشش کرتے، آپ کی تربیت اس بات پر مرکوز تھی کہ تمام صحابہ کے سامنے ان کے حقیقی رب اور اس رب کے حقوق کا صحیح تصور واضح ہوجائے، کیونکہ آپ جانتے تھے کہ جب نفوس پاک صاف ہوں گے اور فطرت راہ راست پر آجائے گی تو یہی تصور یقین اور ایمان کا سبب بنے گا۔

اس طرح سے اللہ تعالیٰ، کائنات، زندگی، جنت اور جہنم، قضا و قدر، انسانی وجود کی حقیقت اور شیطان نیز اس کی محاذ آرائی یہ سب چیزیں علی رضی اللہ عنہ کی نگاہ میں قرآن کریم اور سنت نبوی صلی اللہ علیہ وسلم سے ماخوذ تھیں۔

یقینا اللہ تعالیٰ نقائص و عیوب سے پاک صاف اور اوصاف حمیدہ میں باکمال ہے، وہ یکتا ہے جس کا کوئی شریک نہیں، نہ ہی کوئی بیوی اور نہ ہی کوئی اولاد ہے، وہ ہر چیز کا پیدا کرنے والا، مالک اور اس کا مدبر ہے۔ ارشاد الٰہی ہے:

إِنَّ رَبَّكُمُ اللَّـهُ الَّذِي خَلَقَ السَّمَاوَاتِ وَالْأَرْضَ فِي سِتَّةِ أَيَّامٍ ثُمَّ اسْتَوَىٰ عَلَى الْعَرْشِ يُغْشِي اللَّيْلَ النَّهَارَ يَطْلُبُهُ حَثِيثًا وَالشَّمْسَ وَالْقَمَرَ وَالنُّجُومَ مُسَخَّرَاتٍ بِأَمْرِهِ ۗ أَلَا لَهُ الْخَلْقُ وَالْأَمْرُ ۗ تَبَارَكَ اللَّـهُ رَبُّ الْعَالَمِينَ ﴿٥٤﴾ (الاعراف:54)