شرح تیسیر مصطلح الحدیث

۲۔ حدیث مرسل

۱۔ مرسل کی تعریف:

الف: …لغوی تعریف: لفظ ’’مُرسَل‘‘ ’’اَرْسَلَ‘‘ سے اسمِ مفعول کا صیغہ ہے جس کا معنی ’’چھوڑا ہوا‘‘ ہے۔ گویا کہ ارسال کرنے والے نے اسناد کو چھوڑدیا اور اس کو کسی معروف راوی کے ساتھ مقید نہ کیا۔

ب: …اصطلاحی تعریف: اصطلاح محدثین میں ’’مرسل‘‘ اس حدیث کو کہتے ہیں جس کی سند کے آخر سے ’’تابعی‘‘ کے بعد کا راوی (یعنی سند سے صحابی رضی اللہ عنہ کا نام) ساقط ہو‘‘[1]

۲۔ اصطلاحی تعریف کی شرح:

یعنی وہ حدیث جس کی اسناد سے وہ راوی ساقط ہو جو تابعی کے بعد ہوتا ہے اور (بدیہی بات ہے کہ) وہ صحابیٔ رسول صلی اللہ علیہ وسلم ہوتا ہے۔اور (تعریف میں ) ’’آخر الاسناد‘‘ (کا لفظ آیا ہے) یہ اسناد کی اس طرف کو کہتے ہیں جس میں صحابی ہو۔‘‘

۳۔ ارسال کی صورت:

’’ارسال‘‘ کی صورت یہ ہے کہ تابعی خواہ (مرتبہ اور رتبہ میں ) چھوٹا ہو یا بڑا، یہ کہے ’’قَالَ رَسُوْلُ اللّٰہِ صلي اللّٰه عليه وسلم کَذَا‘‘ یا ’’فَعَلَ کَذَا‘‘ یا ’’فُعِلَ بِحَضْرَتِہٖ کَذَا ‘‘ حضرات محدثین کے نزدیک ’’حدیث مرسَل‘‘ کی یہی صورت ہے۔

۴۔ حدیث مرسَل کی مثال:

اس کی مثال وہ حدیث ہے جو امام مسلم نے اپنی صحیح کی ’’کتاب البیوع‘‘ میں روایت کی ہے۔ جو یہ ہے:حدثنی محمد بن رافع، حدثنا حُجَین، حدثنا اللیث عن عقیل عن ابن شھاب، عن سعید ابن المسیّب انَّ رسول اللّٰہ صلی اللّٰہ علیہ وسلم نھی عن بیع المزابنۃ ‘‘

’’امام مسلم فرماتے ہیں ، ’’مجھے محمد بن رافع نے، وہ کہتے ہیں ہمیں حجین نے، وہ کہتے ہیں ہمیں لیث نے عقیل سے، انہوں نے ابن شہاب زہری سے، انہوں نے (مشہور تابعی) حضرت سعید بن مسیّب رحمہ اللہ سے بیان کیا کہ نبی کریم صلی اللہ علیہ وسلم نے بیع مزابنہ سے منع فرمایا۔‘‘[2]