’’ جو شخص اس آیتِ کریمہ پر کماحقہ تدبر کرکے اس کے صحیح معنی کے فہم کو حاصل کرلے تو وہ صفاتِ باری تعالیٰ میں اختلاف کرنے والوں کے اختلاف کے وقت انتہائی روشن اور واضح جادہ پر چلتا رہے گا ،اور اللہ تعالیٰ کے فرمان :’’وَھُوَ السَّمِیْعُ البَصِیْر‘‘ کے صحیح معنی پر تأمل کے نتیجہ میں اس کی بصیرت میں مزید اضافہ ہوجائے گا ؛کیونکہ ’’وَھُوَ السَّمِیْعُ البَصِیْر‘‘نفیِٔ مماثل کے بعد اثبات ِ صفات پر دلالت کو مشتمل ہے جس سے یقین کی قوت ،سینوں کی شفاء اور دلوں کی ٹھنڈک حاصل ہوتی ہے ۔تو طالبِ حق اس روشن حجت اور انتہائی قوی دلیل کی قدر کو پہچان لے ، تو اس آیتِ کریمہ کے ذریعے بہت سی بدعات کی تفنید کرسکتا ہے ،ضلالت کے بہت سے سروں کو کچل سکتا ہے اور متکلمین کے بہت سے گروہوں کی پیشانیوں کو خاک آلود کرسکتا ہے ،خاص طور پہ اللہ تعالیٰ کے فرمان{ وَلَایُحِیْطُوْنَ بِہٖ عِلْمًا } کو بھی ساتھ ملائے رکھے (تو تیری حجت اہلِ باطل کے خلاف مزید قوی ہوجائے گی ۔ ) ‘‘ { إِنَّ اللّٰه نِعِمَّا یَعِظُکُمْ بِہٖ إِنََّ اللّٰه کَانَ سَمِیْعًا بَصِیْرًا } ترجمہ:’’یقینا وہ بہتر چیز ہے جس کی نصیحت تمہیں اللہ تعالیٰ کررہا ہے بے شک اللہ تعالیٰ سنتا ہے ،دیکھتا ہے‘‘ (النساء:۵۸) …شرح… مؤلف رحمہ اللہ کی پیش کردہ دوسری آیت :’’ إِنَّ اللّٰه نِعِمَّا یَعِظُکُمْ بِہٖ‘‘سے قبل اللہ تعالیٰ کا یہ فرمان ہے:’’إِنَّ اللّٰه یَأْمُرُکُمْ اَنْ تُؤَدُّوا الْاَمَانَاتِ اِلٰی اَھْلِھَا وَإِذَا حَکَمْتُمْ بَیْنَ النَّاسِ اَنْ تَحْکُمُوا بِالْعَدْلِ ‘‘ ترجمہ:’’اللہ تعالیٰ تمہیں تاکیدی حکم دیتا ہے کہ امانت والوں کی امانتیں انہیں پہنچاؤ!اور لوگوں کا فیصلہ کرو تو عدل وانصاف سے فیصلہ کرو!‘‘ |
Book Name | عقیدہ فرقہ ناجیہ |
Writer | فضیلۃ الشیخ الدکتور صالح بن فوزان بن عبداللہ الفوزان |
Publisher | مکتبہ عبداللہ بن سلام لترجمۃ کتب الاسلام |
Publish Year | |
Translator | علامہ عبداللہ ناصر رحمانی |
Volume | |
Number of Pages | 352 |
Introduction | زیر نظر کتاب جس کے مصنف الدکتور صالح بن الفوزان رحمہ اللہ ہیں ، یہ کتاب دراصل شیخ السلام ابن تیمیہ رحمہ اللہ کی مشہور زمانہ کتاب العقیدۃ الواسطیۃ کی جامع ترین شرح ہے۔ اس کا اردو ترجمہ علامہ عبداللہ ناصر رحمانی صاحب حفظہ اللہ نے کیا ہے۔کتاب کا بنیادی موضوع اللہ تعالیٰ کے اسماء وصفات کا قرآن وحدیث کے ادلہ سے اثبات ہے، نیزیہ کہ اسماء وصفات پر منہج سلف صالحین صحابہ وتابعین کے مطابق بلاتکییف ،بلاتحریف، بلاتشبیہ اور بلاتأویل ایمان لانا ضروری ہے۔ ایمان باللہ جو ایمان کا رکنِ اول ہے کی اساس توحید ہے اور فہمِ توحید،اللہ تعالیٰ کے اسماء وصفات کے فہم پر موقوف ہے،لہذا اس علم پر بہت توجہ کی ضرورت ہے ، زیر نظر کتاب اس باب میں انتہائی نافع کتاب ہے۔ |