|
نبی اکرم صلی اللہ علیہ وسلم نے ایک شخص کو دیکھا جو نماز پڑھتے ہوئے سجدہ میں ناک زمین پر نہیں لگا رہا تھا۔ آپ صلی اللہ علیہ وسلم نے فرمایا :
’’سجدہ میں جس کی ناک زمین پر نہیں لگتی اس کی نماز نہیں ہوتی‘‘۔
(دارقطنی:۱/۳۴۸، طبرانی:۱۱۹۱۷، مصنف عبد الرزاق:۲۹۸۲، سنن بیہقی:۲/۱۰۴)
۴۲ ......دو سجدوں کے درمیان دُعاء نہ کرنا:
ایک سجدہ کرنے کے بعد سیدھا بیٹھنا تا آنکہ ہر ہڈی اپنے اصلی مقام پر واپس آجائے ،فرض ہے ۔ نماز ی کو چاہیئے کہ اس وقفے میں ایک اور فضیلت بھی حاصل کر لے اوروہ ہے دو سجدوں کے درمیان دُعا کرنا۔نبی اکرم صلی اللہ علیہ وسلم دو سجدوں کے درمیان یہ دعا کیا کرتے تھے:
((اَللّٰھُمَّ اغْفِرْلِیْ وَارْحَمْنِیْ وَاجْبُرْنِیْ وَارْفَعْنِیْ وَاھْدِنِیْ وَ عَافِنِیْ وَارْزُقْنِیْ)) (ترمذی:۲۸۴، ابوداؤد:۸۵۰)
’’الٰہی مجھے بخش دے، اور مجھ پر رحم فرما اور میرے نقصان پورے کر اور مجھے بلندی عطا کر اور مجھے ہدایت دے اور صحت دے اور رزق دے‘‘۔
۴۳ ......نقش و نگار والے کپڑوں میں نماز پڑھنا:
حضرت عائشہ رضی اللہ عنہابیان کرتی ہیں کہ نبی اکرم صلی اللہ علیہ وسلم کالی اور سفید دھاری والی قمیص میں نماز کے لیئے کھڑے ہوئے تو آپ کی توجہ اس کی دھاریوں کی طر ف مبذول ہو گئی۔ نماز سے فارغ ہونے کے بعد فرمایا :’’یہ دھاری دار قمیص ابوجہم بن حذیفہ کو دے دو اور سادہ قمیص مجھے لا دو، اس قمیص نے مجھے نماز سے غافل کر رکھا تھا ‘‘۔(صحیح بخاری:۳۶۶، صحیح مسلم:۵۵۶) اس لیئے تصویر والے کپڑے میں نماز ادا کرنا منع ہے اور
|