نماز نفل کتاب و سنت کی روشنی میں

ہوا ، اس نے اپنے رب سے اجازت طلب کی کہ وہ مجھے سلام کر ے ، اور مجھے اس بات کی خوشخبری سنائے کہ حضرت فاطمہ ( رضی اللہ عنہا ) اہلِ جنت کی خواتین کی سردار ، اور حضرت حسن ( رضی اللہ عنہ ) اور حضرت حسین ( رضی اللہ عنہ ) اہلِ جنت کے نوجوانوں کے سردار ہو نگے ۔‘‘

[ احمد : ۵/ ۴۰۴ ، الترمذی : ۳۷۸۱ ، النسائی فی الکبری :۳۸۰ ، ابن خزیمہ ۱۱۹۴ ۔ وصححہ الألبانی واحمد شاکر ]

چوتھی قسم : نماز نفل کی چوتھی قسم وہ نمازیں ہیں جو کسی سبب کی بناء پر مشروع کی گئیں ہیں ۔

(۱) تحیۃ المسجد

صحیح مذہب کے مطابق جب بھی کوئی شخص مسجد میں داخل ہو تواس کیلئے تحیۃ المسجد کا پڑھنا سنت مؤکدہ ہے ، جیسا کہ حضرت ابو قتادہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ارشاد فرمایا :

( إِذَا دَخَلَ أَحَدُکُمُ الْمَسْجِدَ فَلْیَرْکَعْ رَکْعَتَیْنِ قَبْلَ أَنْ یَّجْلِسَ )

ترجمہ : ’’ تم میں سے کوئی شخص جب بھی مسجد میں داخل ہو تووہ بیٹھنے سے پہلے دو رکعتیں پڑھ لے ‘‘

اور دوسری روایت میں فرمایا :

( إِذَا دَخَلَ أَحَدُکُمُ الْمَسْجِدَ فَلاَ یَجْلِسْ حَتّٰی یُصَلِّیَ رَکْعَتَیْنِ)

ترجمہ: ’’ تم میں سے کوئی شخص جب بھی مسجد میں داخل ہو تووہ اس وقت تک نہ بیٹھے جب تک دو رکعتیں نہ پڑھ لے ۔‘‘

[ البخاری : ۴۴۴ ، مسلم : ۷۱۴ ]