نیز فرمایا:{ فَرِیْقٔ فِی الجَنَّۃِ وَفَرِیْقٌ فِی السَّعِیْرِ } (الشوریٰ:۷) ترجمہ:’’ایک گروہ جنت میں اور ایک گروہ جہنم میں جائے گا۔‘‘ البتہ دخولِ جنت سے قبل اہلِ ایمان میں قصاص جاری کیا جائے گا ،تاکہ اکمل حالت میں جنت میں داخل ہوں،کہ ان کے ذمہ کوئی ظلم باقی نہ ہو ،شیخ رحمہ اللہ نے اس بات کو ان الفاظ میں بیان کیا’’ جب یہ لوگ پل صراط کو عبور کرلیں گے تو انہیں جنت اور جہنم کے درمیان قائم ایک پل پر روک لیا جائے گا‘‘ اس پل کے متعلق ایک قول تو یہ ہے کہ اس سے مراد پل صراط کی جنت والی طرف ہے اور ایک قول یہ ہے کہ ایک الگ پل ہے جو اہل ایمان کیلئے خاص ہوگا۔ شیخ رحمہ اللہ کی عبارت ’’بعض بعض سے قصاص لے گا‘‘ کامطلب ہے مظالم کا قصاص دلایا جائے گا یعنی مظلوم کو ظالم سے حق دلایا جائے گا۔ مظالم سے پاک صاف کردیئے جانے کے بعد ہی دخولِ جنت کی اجازت ملے گی،کا مطلب یہ ہے کہ جب سب کو ان کے حقوق مل جائیں گے ، اور مظالم کا بدلہ مل جائے گا تو دلوں کا بغض وکینہ ختم ہوجائے گا ، تو پاک وصاف دل کے ساتھ جنت میں داخل ہوںگے۔ اللہ تعالیٰ کافرمان ہے: { وَنَزَعْنَا مَافِیْ صُدُوْرِھِمْ مِّنْ غِلٍّ إِخْوَانًا عَلٰی سُرُرٍ مُّتَقَابِلِیْنَ } (الحجر:۴۷) ترجمہ:’’انکے دلوں میں جو کچھ رنجش وکینہ تھا، ہم سب کچھ نکال دیں گے وہ بھائی بھائی بنے ہوئے ایک دوسرے کے آمنے سامنے تختوں پر بیٹھے ہوں گے‘‘ |
Book Name | عقیدہ فرقہ ناجیہ |
Writer | فضیلۃ الشیخ الدکتور صالح بن فوزان بن عبداللہ الفوزان |
Publisher | مکتبہ عبداللہ بن سلام لترجمۃ کتب الاسلام |
Publish Year | |
Translator | علامہ عبداللہ ناصر رحمانی |
Volume | |
Number of Pages | 352 |
Introduction | زیر نظر کتاب جس کے مصنف الدکتور صالح بن الفوزان رحمہ اللہ ہیں ، یہ کتاب دراصل شیخ السلام ابن تیمیہ رحمہ اللہ کی مشہور زمانہ کتاب العقیدۃ الواسطیۃ کی جامع ترین شرح ہے۔ اس کا اردو ترجمہ علامہ عبداللہ ناصر رحمانی صاحب حفظہ اللہ نے کیا ہے۔کتاب کا بنیادی موضوع اللہ تعالیٰ کے اسماء وصفات کا قرآن وحدیث کے ادلہ سے اثبات ہے، نیزیہ کہ اسماء وصفات پر منہج سلف صالحین صحابہ وتابعین کے مطابق بلاتکییف ،بلاتحریف، بلاتشبیہ اور بلاتأویل ایمان لانا ضروری ہے۔ ایمان باللہ جو ایمان کا رکنِ اول ہے کی اساس توحید ہے اور فہمِ توحید،اللہ تعالیٰ کے اسماء وصفات کے فہم پر موقوف ہے،لہذا اس علم پر بہت توجہ کی ضرورت ہے ، زیر نظر کتاب اس باب میں انتہائی نافع کتاب ہے۔ |