مگر انھوں نے غور نہیں کیا کہ امام ترمذی رحمہ اللہ نے اس کے بعد یہ بھی فرمایا ہے وقد رواہ اصحاب شعبۃ ھذا الحدیث عن عاصم الاحول عن حفصۃ ابنۃ سیرین عن الرباب عن سلمان بن عامر کہ سعید رحمہ اللہ کے علاوہ شعبہ رحمہ اللہ کے دوسرے شاگرد اسے عاصم الاحول عن حفصۃ عن الرباب عن سلمان کی سند سے بیان کرتے ہیں۔ گویا اصل روایت حضرت سلمان بن عامر سے ہے، حضرت انس رضی اللہ عنہ سے نہیں(ترمذی مع التحفہ: ج ۲ ص ۳۶) یہاں امام ترمذی رحمہ اللہ نے شعبہ رحمہ اللہ کے باقی شاگردوں کے مقابلے میں سعید رحمہ اللہ کی روایت کو غیر محفوظ قرار دیا ہے مگر زیر بحث روایت میں شعبہ کا کوئی اور شاگرد سعید رحمہ اللہ کی مخالفت نہیں کرتا۔ اگر یہ مخالفت ہے تو امام شعبہ رحمہ اللہ کی ہے، سعید رحمہ اللہ کی قطعاً نہیں جیسا کہ ڈیروی صاحب سمجھ رہے ہیں۔ سعید رحمہ اللہ بن عامرثقہ اور صدوق ہیں ا ور ثقہ و صدوق سے بھی غلطی کا امکان ہے۔ مگر اس روایت میں ان کی طرف غلطی کا انتساب حقیقت پر مبنی نہیں بلکہ محض عصبیت کا نتیجہ ہے۔ ڈیروی صاحب نے یہاں یہ دھوکا بھی دیا کہ امام ابوحاتم رحمہ اللہ اور حافظ ابن حجر رحمہ اللہ کے حوالہ سے صاحب وہم و خطا باور کراتے ہوئے راقم کے حوالے سے لکھ دیا کہ اثری صاحب نے کہا ہے کہ معمولی وہم اس کے ضعف کا باعث نہیں تاوقتیکہ دلائل قویہ سے وہم ثابت ہو تو ایسی صورت میں اس کی صرف اس روایت سے اعتناء نہیں ہوگا جس میں وہم ہوا ہے(توضیح : ج۱ ص ۵۰۲،۵۰۳، ایک نظر: ص ۶۸) حالانکہ راقم نے تو واشگاف الفاظ میں لکھا ہے کہ صحیح یہ ہے کہ ان (سعید رحمہ اللہ ) کی طرف خطا وغلطی کا الزام ناقابل اعتبار ہے‘‘ جس کی تفصیل توضیح(ج ۱ ص ۵۰۳) میں دیکھی جا سکتی ہے۔ ڈیروی صاحب کی شرافت دیکھیے جو بات راقم نے علی سبیل الاعتراف کہی اس کو بنیاد بنا کر اپنا دعویٰ ثابت کر رہے ہیں، حالانکہ اس اعتبار سے بھی ان کا دعویٰ سراسر دھوکا پر مبنی ہے اور جو بات صحیح طو ر پر عرض کی گئی اس کی طرف آنکھ اٹھا کر دیکھنے کی بھی زحمت نہیں کی۔ انا للہ و انا الیہ راجعون۔ |
Book Name | تنقیح الکلام فی تایید توضیح الکلام |
Writer | ارشاد الحق اثری حفظہ اللہ |
Publisher | ادارۃ العلوم الاثریہ فیصل آباد |
Publish Year | ستمبر 2004ء |
Translator | |
Volume | |
Number of Pages | 377 |
Introduction |