تحفۂ وقت

قرآن سے محبت اللہ اور اس کے رسول سے محبت کی دلیل ہے ، آپ صلی اللہ علیہ وسلم نے فرمایا:

((مَنْ أَحَبَّ الْقُرْآنَ فَھُوَ یُحِبُّ اللّٰہَ وَرَسُوْلَہٗ۔))[1]

’’جس نے قرآن سے محبت کی وہ اللہ اور اس کے رسولؐ سے محبت کرتا ہے۔ ‘‘

لہٰذاکوئی تفسیر جیسے مختصر ابن کثیر، احسن البیان ، مختصر طبری لے کر لفظ بلفظ پڑھ ڈالیں ، ایمان اور عمل میں اضافہ ہوگا۔

کُنْ فِيْ أُمُوْرِکَ کُلِّھَا مُتَمَسَّکًا

بِالْوَحْيِ لَا بِزَخَارِفِ الْھِذْیَانِ

وَتَدَبِّرَ الْقُرْآنَ إِنْ رِمْتَ الْھُدٰی

فَالْعِلْمُ تَحْتَ تَدَبَّرِ الْقُرْآنِ [2]

’’ اپنے تمام امور میں وحی کو مضبوطی سے پکڑیے نہ کہ خوبصورت بیہودہ گوئی کو۔ اور اگر تمہیں ہدایت کی تلاش ہے تو قرآن کے معانی میں تدبر کیجیے ، کیونکہ علم قرآن میں تدبر کرنے میں ہے۔‘‘

قرآن مجید تو سارا ہی خیرو برکت اور رحمت ہے ، لیکن اس میں بعض جگہیں ایسی ہیں جن کی خاص فضیلت وارد ہوئی ، عام فائدہ کے پیش نظر اسے بیان کرنا سود مند ہوگا۔

سورت ملک،آخرت کا سامان :

نبی کریم صلی اللہ علیہ وسلم نے فرمایا:

(( سُوْرَۃٌ مِنَ الْقُرْآنِ مَاھِيَ إِلَّا ثَلاَثُوْنَ آیَۃً خَاصَمَتْ عَنْ صَاحِبِھَا حَتیّٰ أَدْخَلَتْہُ الْجَنَّۃَ، وَھِيَ تَبَارَکَ۔))[3]