بدعات سنت کے میزان میں

زبان سے نیت

لغوی معنی :

نیت کے لغوی معنی قصد و ارادہ کے ہیں ۔

اصطلاحی تعریف :

علامہ بیضاوی رحمہ اللہ (۶۸۵ھ) لکھتے ہیں :

اَلشَّرْعُ خَصَّصَہَا بِالْإِرَادَۃِ الْمُتَوَجِّہَۃِ نَحْوَ الْفِعْلِ ابْتِغَائً لِّوَجْہِ اللّٰہِ تَعَالٰی وَامْتِثَالًا لِّحُکْمِہٖ ۔

’’شریعت میں نیت کسی کام کے ارادے کا نام ہے، جس میں اللہ کی رضا اور اس کے حکم کی بجا آوری مقصود ہو۔‘‘

(تحفۃ الأبرار : 1/20)

علامہ کاسانی حنفی رحمہ اللہ (۵۸۷ھ) لکھتے ہیں :

اَلنِّیَّۃُ ہِيَ الْإِرَادَۃُ، فَنِیَّۃُ الصَّلَاۃِ ہِيَ إرَادَۃُ الصَّلَاۃِ لِلّٰہِ تَعَالٰی عَلَی الْخُلُوصِ، وَالْإِرَادَۃُ عَمَلُ الْقَلْبِ .

’’نیت ارادے کا نام ہے، لہٰذا نماز کی نیت یہ ہے کہ اللہ کے لیے خلوص دل سے نماز کا قصد کریں اورارادہ دل کا عمل ہے۔‘‘

(بدائع الصّنائع : 1/127)