Maktaba Wahhabi

94 - 586
داعی کے اوصاف اب ہم وہ اوصاف بیان کریں گے جن سے ہر مبلغ اور داعی کو متصف ہونا ضروری ہے اور اگر کسی داعی یا مبلغ میں یہ اوصاف نہیں پائے جائیں گے تو وہ اپنے دعوتی مشن میں کامیابی نہیں پا سکے گا اور اس کے ساتھ ساتھ شدید محنت کے باوجود اجر و ثواب سے بھی محروم ہو سکتا ہے۔ لہٰذا ضروری ہے کہ ہر داعی ان اوصاف سے کامل طور پر متصف ہو۔ 1. اخلاص: دعوتی مشن کو اختیار کرنے والے میں اخلاص ہونا چاہیے، وہ خالصتاً اللہ کی رضا کے لیے یہ کام کرے۔ دنیا کی چاہت، دنیوی مقاصد کے حصول، دنیا میں تعریف اور واہ واہ کروانے کے لیے اس مشن کو اختیار نہ کرے۔ صحابہ کرام رضی اللہ عنہم کو رسول اللہ صلی اللہ علیہ وسلم نے اس سلسلے میں ایسی تعلیم دی ہوئی تھی کہ اگر کوئی شخص ان کی تعریف کرتا تو وہ جواباً کہتے: اَللّٰھُمَّ لَا تُؤَاخِذْنِی بِمَا یَقُولُونَ وَاغْفِرْ لِی مَا لَا یَعْلَمُونَ، وَاجْعَلْنِی خَیْرًا مِمَّا یَظُنُّونَ۔[1] ’’اے اللہ! جو کچھ یہ کہہ رہے ہیں، ان باتوں پر میرا مواخذہ نہ فرمانا، اور میرے ان گناہوں کو بخش دینا جو ان کے علم میں نہیں ہیں، اور مجھے اس سے بھی بہتر بنا دے جیسا یہ میرے بارے میں گمان کرتے ہیں۔‘‘ اسی کے متعلق فرمانِ باری تعالیٰ ہے: ﴿ وَمَا أُمِرُوا إِلَّا لِيَعْبُدُوا اللّٰهَ مُخْلِصِينَ لَهُ الدِّينَ ﴾ [البینۃ: ۵]
Flag Counter