| اور ایک حدیث میں ہے کہ آپ صلی اللہ علیہ وسلم نے قرآنِ پاک کے بارے میں ارشاد فرمایا: ((ھُوَ حَبْلُ اللّٰہِ مَنْ تَمَسَّکَ بِہٖ کَانَ عَلٰی الْھُدیٰ وَمَنْ تَرَکَہٗ کَانَ عَلٰی الضَّلَالِ)) (حدیث) ’’یہ اللہ کی رسّی ہے جس نے اس کے ساتھ تمسّک کیا وہ ہدایت والا ہے اور جس نے اسے چھوڑدیا وہ ضلالت وگمراہی کے گڑھے میں گرگیا۔‘‘ اس مفہوم ومعنیٰ کی احادیث بکثرت ہیں ۔ کتاب اللہ اور اس کے ساتھ ساتھ سنتِ رسول صلی اللہ علیہ وسلم سے تمسّک اور تمام فیصلہ طلب امور میں انہیں اپنا حَکم ومُنصِف بنانے کے وجوب پر اہلِ علم وایمان صحابۂ کرام رضوان اللہ علیہم اجمعین اور تابعین وتبع تابعین رحمہم اللہ کے اجماع پر کا فی وشافی دلائل موجود ہیں ۔البتہ یہاں ان کا ذکر کرنا باعثِ طوالت ہوگا۔ ماْخذِ ثانی .حدیثِ شریف: شریعتِ اسلامیہ کے پہلے تین متّفق علیہ مآخذومصادر میں سے دوسرا ماْخذ رسول اللہ صلی اللہ علیہ وسلم کی صحیح وثابت شدہ قولی،فعلی اور تقریری حدیث(سنت)ہے۔اور رسول اللہ صلی اللہ علیہ وسلم کے صحابۂ کرام رضی اللہ عنہم اور ان کے بعد آنے والے لوگوں کا ہمیشہ اس اصلِ اصیل پرایمان رہا ہے۔وہ اس سے حُجّت پکڑتے آئے اور اُمت کو اس کی تعلیم دیتے رہے ہیں ۔اس موضوع پر انہوں نے بیشمار کتابیں لکھی ہیں اور اصولِ فقہ ومصطلحات کی کتابوں میں اس کی خوب خوب وضاحت کی ہے اور اس کے دلائل اس قدر بکثرت ہیں کہ انکا حصر واحاطہ کرنا ناممکن ہے۔ حُجیّتِ حدیث کے دلائل: سنّت وحدیثِ رسول صلی اللہ علیہ وسلم کے دوسرا مصدرِ شریعت اورحُجیّت ہونے کے دلائل میں سے کتاب اللہ کی وہ آیات دلالت کناں ہیں ،جن میں اللہ تعالیٰ نے نبی اکرم صلی اللہ علیہ وسلم کی اتّباع |