علم حدیث میں اسناد و متن کی تحقیق کے اصول محدثین اور فقہاء کے طرز عمل کی روشنی میں
مؤلف: حافظ حمزہ مدنی
ناشر: شعبہ علوم اسلامیہ، دی اسلامیہ یونیورسٹی آف بہاولپور
سال شائع: 2008ء
92
٭ ایک دوسرے مقام پر فرماتے ہیں: علم الإسناد مما خص اللّٰہ بہ أمۃ محمد صلي اللّٰه عليه وسلم وجعلہ سلما إلی الدرایۃ فأھل الکتاب لا إسناد لھم ۳۳؎ ’’اِسناد وروایت کا علم ایسی خصوصیت ہے جو اللہ تعالیٰ نے صرف امت ِ محمد صلی اللہ علیہ وسلم کو عنایت فرمائی ہے ، اسے درایت کے لیے سیڑھی بنایا ہے اور اہل کتاب کے پاس کوئی اِسناد نہیں ۔ ‘‘ اِسناد حدیث کی تحقیق کے اصولوں کو ہم چار مباحث کے تحت بیان کریں گے: ٭ راوی کا کردار ( عدالت) ٭ راوی کی صلاحیت ( ضبط) ٭ اتصال سند ٭ سند کا علت وشذوذ سے خالی ہونا بحث اول: راوی کا کردار (عدالت) کسی بھی حدیث کے صحیح ہونے کے لیے محدثین رحمہم اللہ کی مقرر کردہ اساسی شرائط میں سے ایک عدالت اور دوسری ضبط ہے ۔ متقدم محدثین رحمہم اللہ نے ان شرائط کی طرف اشارہ تو کیا تھا مگر ان کے نام متعین نہیں کیے تھے، جیسا کہ٭ اِمام شعبہ بن حجاج رحمہ اللہ (م ۱۶۰ ھ) سے جب دریافت کیا گیا کہ کس شخص کی روایت کو ترک کر دینا چاہیے، تو انہوں نے فرمایا:1۔ جب کوئی معروف لوگوں سے ایسی حدیث بیان کرے جسے معروف لوگ نہ جانتے ہوں تو اس کی حدیث ترک کر دی جائے ۔2۔ جس پر حدیث کے بارے میں کوئی تہمت لگی ہو اس کی حدیث ترک کر دی جائے ۔ 3۔ جب کوئی بکثرت غلطیاں کرے تو اس کی حدیث ترک کر دی جائے ۔ 4۔ جب کوئی ایسی حدیث روایت کرے جس کے غلط ہونے پر اتفاق ہو تو اس کی روایت ترک کر دی جائے ۔ ان کے علاوہ جو لوگ ہوں ان کی روایت قبول کر لینی چاہیے ۔‘‘۳۴؎ ٭ اِمام ابن مہدی رحمہ اللہ (م ۱۹۸ ھ) نے فرمایا کہ تین آدمیوں سے حدیث نہ لی جائے :1۔ جس پر جھوٹ کی تہمت ہو ۔2۔ ایسا بدعتی جواپنی بدعت کی طرف دعوت دے ۔ 3 ایسا شخص جس پر وہم اور غلطی غالب ہو ۔‘‘ ۳۵؎ ٭ اِمام ابن مبارک رحمہ اللہ (م ۱۸۱ ھ) نے فرمایا کہ چار آدمیوں سے حدیث نقل نہ کی جائے :1۔ بہت زیادہ غلطیاں کرنے والا جو رجوع نہ کرے ۔ 2۔ بہت زیادہ جھوٹ بولنے والا ۔ 3۔ بدعتی جو اپنی بدعت کی طرف بلائے ۔ 4۔ ایسا شخص جو حدیث حفظ نہ کرے مگر اپنے حافظے سے حدیث بیان کرے ۔‘‘ ۳۶؎ ٭ اِمام مالک رحمہ اللہ (م ۱۷۹ ھ) نے فرمایا کہ چار طرح کے آدمیوں سے علم (حدیث) حاصل کرنا جائز نہیں :1۔ بیوقوف ، جس کی بے وقوفی ظاہر ہو خواہ وہ بہت زیادہ روایت کرنے والا ہی ہو ۔