Maktaba Wahhabi

علم حدیث میں اسناد و متن کی تحقیق کے اصول محدثین اور فقہاء کے طرز عمل کی روشنی میں

مؤلف: حافظ حمزہ مدنی

ناشر: شعبہ علوم اسلامیہ، دی اسلامیہ یونیورسٹی آف بہاولپور

سال شائع: 2008ء

233
دین میں کسی بات کے تعین کے سلسلہ میں کوئی اضافی حق نہیں رکھتے۔ کیا اہل مدینہ کا عمل یا دوسری صدی میں لوگوں کا رواج و تعامل احکاماتِ شریعت کی تعیین کے لئے حتمی و قطعی ذریعہ ہیں ؟ باقی رہا اس ضمن میں اصحاب مالک رحمہ اللہ (م ۱۷۹ھ) کا یہ مفروضہ کہ اِمام مالک رحمہ اللہ (م ۱۷۹ھ)کے زمانے میں لوگوں کاجو عمل تھا، وہ عہد صحابہ سے منقول چلا آرہا تھا چنانچہ اسے سنت نبوی صلی اللہ علیہ وسلم کی روایت ہی سمجھا جائے، تو اس پر ہم احتراما عرض کریں گے کہ یہاں انہوں نے دو پہلوؤں سے غلطی کی ہے: 1۔ پہلی غلطی اس تصور میں کہ’ عمل اہل مدینہ تمام مسلمانوں کے لئے حجت ہے‘۔ یہی وجہ ہے کہ خود اس کی حیثیت محققین اصحاب مالک رحمہ اللہ کے بقول اِمام مالک رحمہ اللہ (م ۱۷۹ھ)کے ہاں مسلم نہ تھی،جیساکہ محقق مالکی علماء قاضی عبدالوہاب رحمہ اللہ (م ۷۷۱ھ) اور ابوالولید الباجی رحمہ اللہ (م ۴۷۴ھ)نے اس کی وضاحت کی ہے کہ اگر اِمام مالک رحمہ اللہ (م ۱۷۹ھ) کی نگاہ میں اس کی کچھ حیثیت ہوتی تو جب خلیفہ ہارون الرشید رحمہ اللہ (م ۱۹۳ھ)نے ان سے چاہا کہ تمام مسلمانوں کو موطا پرعمل کرنے کے لئے کہا جائے اور اسے دستور کی حیثیت دے دی جائے تو وہ اس کی بات مان لیتے، لیکن انہوں نے اسے نہ مانا اور فرمایا:’’رسول اللہ صلی اللہ علیہ وسلم کی وفات کے بعد آپ صلی اللہ عليہ وسلم کے صحابہ کرام رضی اللہ عنہم مختلف ممالک میں پھیل گئے ہیں اور ان میں سے ہر ایک گروہ کے پاس وہ علم ہے جو دوسروں کے پاس نہیں ہے۔ میں نے تو فقط اپنے شہروالوں کا علم یکجا کیا ہے۔اس متاخر عمل کوحجت فقط بعض جامدمقلد قسم کے مالکی علماء ہی مانتے ہیں ۔۱۰؎ 2۔ ان کا سارے کا سارا عمل عہد صحابہ رضی اللہ عنہم سے منقول چلا آرہا ہے۔ اس کے جس حصے کی واقعی یہ حیثیت ہے اس کی حجیت ان ہی کو نہیں ، بلکہ سب کو تسلیم ہے اور اس کا جو حصہ اجتہاد اور استدلال پر مبنی ہے، ان کے اور دوسروں میں ا ختلاف اس کے بارے میں ہے اور اس اجتہاد یا استدلال کو شریعت قرار دینا اور اس پر عمل اہل مدینہ کا حجت گرداننا کسی طور پر صحیح نہیں اور یہ کیو ں نہ ہو کہ خود مدینہ میں خلافت راشدہ کے دور ثالث کے آخر میں شہادت عثمان بن عفان رضی اللہ عنہ کے بعد فتنوں کا دروازہ کھل گیا تھا۔ چند روایات کی روشنی میں مذکورہ اصول کا جائزہ فقہائے مالکیہ رحمہم اللہ کی طرف سے نقدروایت کے درایتی تصور میں مذکورہ عنوان کے اعتبار سے جن احادیث کو ناقابل قبول گردانا گیا ہے، ان میں سے چند کا تذکرہ بطور مثال ذیل میں کیا جارہا ہے: مثال نمبر۱ صحیح بخاری میں حضرت عبد اللہ بن عمر رضی اللہ عنہ سے روایت ہے کہ رسول اللہ صلی اللہ عليہ وسلم نے فرمایا: ((المتبایعان کل واحد منہما بالخیار علی صاحبہ ما لم یتفرقا)) ۱۱؎ ’’ دو آدمی جب آپس میں بیع کریں تو ایک دوسرے سے جدا ہونے سے پہلے پہلے دونوں کو بیع فسخ کرنے کا اختیار ہے۔‘‘ اعتراض ٭ مذکورہ حدیث کے بارے میں امام ابن عبدالبر رحمہ اللہ (م ۴۶۳ھ)لکھتے ہیں : ولا یری العمل بحدیث خیار المتبایعین.... لما اعترضہما عندہ من العمل۱۲؎ ’’اِمام مالک رحمہ اللہ (م ۱۷۹ھ) خیار مجلس کی حدیث پر عمل نہیں کرتے کیونکہ یہ عمل اہل مدینہ کے معارض ہے۔‘‘
x
صفحہعنوان
1باب اَوّل اِسنادو متن ....معنی، مفہوم اور ارتقاء
2فصل اَوّل اِسناد ومتن کا معنی ومفہوم اور چند بنیادی اصطلاحات کا تعارف
30فصل دوم اِسناد ومتن کی تحقیق کا اِرتقاء اور نشوونما
31اِسناد ومتن کی تحقیق کا اِرتقاء اور نشوونما.... عہد رسالت صلی اللہ علیہ وسلم میں
35اِسناد ومتن کی تحقیق کا اِرتقاء اور نشوونما.... عہد صحابہ رضی اللہ عنہم میں
39اِسناد ومتن کی تحقیق کا اِرتقاء اور نشوونما.... عہد تابعین رحمہم اللہ میں
39اِسناد ومتن کی تحقیق کا اِرتقاء اور نشوونما.... عہد تبع تابعین رحمہم اللہ میں
41اِسناد ومتن کی تحقیق کا اِرتقاء اور نشوونما .... عہد تدوین میں
57فصل سوم روایت ودرایت معنی ومفہوم اور مختلف علوم میں ان کا استعمال
85باب دوم اِسناد ومتن کی تحقیق کا طریقہ کار محدثین کرام رحمہم اللہ کے اصولوں کی روشنی میں
86فصل اوّل اِسنادِ حدیث کی تحقیق کے محدثانہ اُصول
92بحث اول: راوی کا کردار (عدالت)
104بحث ثانی: راوی کی صلاحیت (ضبط)
112بحث ثالث: اِتصال سند
116بحث رابع: سند میں شذوذ وعلت
128فصل دوم متن ِ حادیث کی تحقیق کے محدثانہ اصول
141بحث اَول : شذوذ فی المتن
148بحث ثانی: علت فی المتن
163بحث ثالث: موضوع احادیث کو پہچاننے کی علامات
181باب سوم اِسناد ومتن کی تحقیق....فقہاے کرام رحمہم اللہ کے اُصول اور ان کا جائزہ
186فصل اوّل فقہائے حنفیہ رحمہم اللہ کے درایتی اصول اور بعض امثلہ کی روشنی میں ان کا جائزہ
228فصل دوم فقہائے مالکیہ رحمہم اللہ کے درایتی اصول اور بعض امثلہ کی روشنی میں ان کا جائزہ
247باب چہارم علم فقہ اور علم حدیث کا باہمی تعلق اور تقابل محدثین اورفقہاء کے طرز عمل کی روشنی میں
248فصل اَوّل علم حدیث اور علم فقہ دو مختلف فنون ِعلم دونوں کا باہمی تعلق اور تقابل
263فصل دوم اہل فقہ اور اہل حدیث کی باہمی کشمکش اسباب، نتائج اور حل
282فصل سوم السنۃ بین أہل الفقہ وأہل الحدیث شیخ محمد الغزالی رحمہ اللہ کی تصنیف کا تنقیدی جائزہ
306باب پنجم دورِ حاضر میں نقد روایت کا درایتی تصور ایک تنقیدی جائزہ
307فصل اول بر صغیر میں نقد روایت میں عقل کی بنیاد پر استخفاف ِحدیث کا آغاز
318فصل دوم جدید تصور درایت اور جدت پسند مفکرین کے درایتی اصول
321مولانا شبلی رحمہ اللہ کے درایتی اصول
324مولانا حمید الدین فراہی رحمہ اللہ کے درایتی اصول
326مولانا اصلاحی رحمہ اللہ اور جاوید غامدی کے درایتی اصول
343باب ششم اِسناد ومتن کی تحقیق میں صحابہ رضی اللہ عنہم اورمحدثین رحمہم اللہ کا منہج چند شکوک وشبہات اور ان کاتنقیدی جائزہ
344فصل اَوّل قبو ل ِحدیث میں صحابہ کا منہج اور ’اِستدراکات صحابہ‘ کی نوعیت
349درایت عائشہ رضی اللہ عنہا کے حوالہ سے چندامثلہ اور ان کا جائزہ
362دیگر صحابہ کے درایتی نقد کی چند مثالیں اور ان کا جائزہ
376فصل دوم چند معروف محدثین رحمہم اللہ کی طر ف منسوب عقلی درایتی اصولوں کی وضاحت
390فصل سوم صحیح بخاری اور صحیح مسلم کی احادیث نبویہ پر محدثین کرام رحمہم اللہ کے حوالے سے پیش کردہ درایتی نقد کی حقیقت
417مراجع ومصادر
Flag Counter