| ان کے اسلام قبول کرنے کے باوجود آغاز ہجرت تک اس کا اثر ان میں باقی تھا، لیکن اس کے بعد رسول اکرم صلی اللہ علیہ وسلم کی تعلیم و تربیت سے ایسی قباحتوں کی بیخ کنی ہوگئی اور وہ آپس میں ایک دوسرے کے بھائی بھائی بن گئے تھے۔ مگر اس سے قبل چونکہ ان میں جاہلیت کی عداوتیں اور کدورتیں باقی تھیں جن کی بناء پربعض دفعہ نوبت لڑائی جھگڑے تک پہنچ جاتی تھی، جیسا کہ اس مرتبہ بھی جھگڑا مسلمانوں اور غیر مسلموں سے تجاوز کرکے اوس اور خزرج دو قبائل تک پھیل گیا تھا کیونکہ عبد اللہ بن ابی کا تعلق اوس وخزرج میں سے جس قبیلہ سے تھا اس قبیلہ کے لوگ خاندانی عصبیت کی بنیاد پردوسرے قبیلہ کے اپنے ہی مسلمان بھائیوں کے مدمقابل آ کھڑے ہوئے اور یوں یہ لڑائی مسلمان قبائل میں بھڑک اٹھی، جن کے درمیان صلح کروانے کا حکم دیتے ہوئے مذکورہ آیت نازل ہوئی۔ حدیث بخاری اور تفسیری روایات ایک ہی وقت میں قابل عمل نہیں ہیں، کیونکہ دونوں کا محل اور مراد مختلف ہے۔ حدیث بخاری دراصل اس تنازع کی ابتدائی صورت کی طرف اشارہ کرتی ہے کہ جس میں جھگڑے کے فریقین مسلم اور غیر مسلم سب تھے، لہٰذا آیت کے شان نزول میں بیان کی جانے والی جمیع تفسیری روایات اپنے محل میں بالکل واضح ہیں، لیکن ان تفسیری روایات کا مصداق مومنین کی جماعتیں ہیں، عبداللہ بن ابی کے حاملین نہیں، کیونکہ عبداللہ بن ابی تو اس وقت صریحا کافر تھا اور اصل جھگڑا دو مسلمان فریقوں میں ہوا تھا، جن کے مابین صلح کروانے کا اللہ تعالیٰ نے حکم دیا۔ اب یہ سوال ہی باقی نہیں رہتا کہ عبد اللہ بن ابی کو کافر کی بجائے مومن کہنے کی کیا وجہ ہے، کیونکہ جب نزاع اور صلح کا تعلق ہی عبداللہ بن ابی سے نہیں ہے تو اس کو آیت میں مذکور لفظ’مومن‘ کا مصداق کیونکر ٹھہرایا جاسکتا ہے؟ ایک اور اشکال اور اس کا حل حافظ ابن حجر رحمہ اللہ نے یہاں ایک دوسرا اشکال یہ اٹھایا ہے کہ جھگڑے کا یہ واقعہ جنگ بدر سے پہلے آغاز ہجرت کا ہے، جس کے بارے میں آیت:﴿ وَ اِنْ طَآىِٕفَتٰنِ مِنَ الْمُؤْمِنِيْنَ اقْتَتَلُوْا فَاَصْلِحُوْا بَيْنَهُمَا﴾ نازل ہوئی ہے اور یہ آیت جس سورت ( حجرات) میں واقع ہے وہ سورت بہت بعد میں نازل ہوئی ہے۔ اس کا جواب ابن حجر رحمہ اللہ ہی کی طرف سے یہ ہے کہ ممکن ہے یہ آیت متقدم النزول ہو اور رسول اللہ صلی اللہ علیہ وسلم کے حکم سے اسے سورۃ حجرات میں رکھا گیا ہو جو متاخر النزول ہے اور یہ تنجیم القرآن کا تقاضا بھی ہے کیونکہ آپ صلی اللہ علیہ وسلم پر جب کوئی آیت نازل ہوا کرتی تھی تو آپ صلی اللہ علیہ وسلم کاتبِ وحی سے فرماتے کہ اس آیت کو فلاں سورت کے فلاں مقام میں درج کردو۔ 5۔سنن ابو داؤد میں حضرت عبداللہ بن عمروبن العاص سے روایت ہے کہ رسول اللہ صلی اللہ علیہ وسلم نے وضو کرتے ہوئے اپنے اعضاء کو تین تین مرتبہ دھویا اور پھر فرمایا: ((من زاد على هذا أو نقص فقد أساء وظلم.)) ’’جس نے اس میں کمی وبیشی کی اس نے برا کیا اور ظلم کیا۔‘‘ |