|
1- الوہیت میں منفرد:
عبادت کی مستحق تنہا اللہ وحدہ لا شریک کی ذات ہے جو زندہ ہے جسے کبھی موت نہیں آئے گی،جو قیوم ہے،بذات خود قائم ہے اور تمام مخلوقات سے بے نیاز ہے اور مخلوق ہر ہر چیز میں اس کی محتاج ہے،اللہ تعالیٰ کی کمال زندگی اور کمال قیومیت کی ایک دلیل یہ ہے کہ اسے نہ تو اونگھ آتی ہے اور نہ ہی نیند آتی ہے اور آسمانوں اور زمین کی تمام مخلوقات اس کے بندے ہیں اور اس کے قہر اور بادشاہت کے ما تحت ہیں،ارشاد باری ہے:
﴿إِنْ کُلُّ مَنْ فِيْ السَّمَاوَاْتِ وَالْأَرْضِ إِلَّا آتِيْ الرَّحْمٰنِ عَبْداً،لَقَدْ أَحْصَاھُمْ وَعَدَّھُمْ عَداًّ﴾[1]۔
آسمانوں اور زمین میں جو بھی ہیں وہ سب کے سب اللہ کے غلام ہی بن کر آنے والے ہیں،ان سب کو اس نے گھیر رکھا ہے اور سب کو پوری طرح گن بھی رکھا ہے۔
اور اللہ تعالیٰ کی کمال بادشاہت اور عظمت و کبریائی کی ایک دلیل ہے کہ اس کے پاس اس کی اجازت کے بغیر کوئی سفارش نہیں کر سکتا،چنانچہ تمام اہل وجاہت اور سفارشی اللہ کے غلام اور بندے ہیں،وہ کسی کی سفارش نہیں کر سکتے یہاں تک کہ اللہ عز وجل کی اجازت ہو جائے،اور اللہ کی اجازت اسی کے لئے ہوگی جس سے وہ راضی ہوگا،اور اللہ تعالیٰ کا علم تمام کائنات کو محیط ہے،اس کے علم کے ادنیٰ حصہ پر کوئی مطلع نہیں ہو سکتا سوائے اس کے جس کی اس نے ان کو اطلاع دیدی ہے،اور اس کی عظمت کی ایک دلیل یہ ہے کہ اس کی کرسی تمام آسمانوں اور زمین کو وسیع ہے،اور اللہ تعالیٰ آسمان وزمین اور ان کے درمیان کی مخلوقات کی حفاظت کئے ہوئے ہے،اور ان دونوں کی حفاظت اس کے لئے دشوار نہیں،بلکہ انتہائی سہل اور نہایت آسان ہے،وہ ہر چیز پر غالب اور اپنی ذات سے اپنی تمام مخلوقات پر بلند ہے،اور اپنی عظمت و صفات سے عالی وبرتر ہے،وہ بلند ہے جو تمام مخلوقات پر غالب ہے اور تمام موجودات اس کے تابع ہیں،وہ عظیم،عظمت وکبریائی کی صفات کا جامع ہے،ان عظیم صفات کی دلیل اللہ تعالیٰ کا درج ذیل فرمان ہے:
|