Maktaba Wahhabi

141 - 236

یہاں یہ بات پیشِ نظر رہے کہ حدیث و سنت سے مراد صرف وہی احادیث ہو سکتی ہیں جو سند و متن کے اعتبار سے صحیح یا کم از کم حسن درجے کی ہوں،ضعیف روایات تو لائقِ استدلال ہی نہیں ہوتیں اور صحیح و حسن درجے کی احادیث و آثار فریقِ اول کے دلائل کے ضمن میں ذکر کی جا چکی ہیں،جن کی رو سے امام کی طرح مقتدی کے لیے بھی سورت فاتحہ ضروری ہے،چاہے وہ سکتات ہی میں کیوں نہ ہو۔ تیسرا جواب: قرآن کی آیت:﴿وَإِذَا قُرِئَ الْقُرْآنُ ﴾ سے استدلال کرتے ہوئے مانعینِ قراء تِ فاتحہ جو یہ کہتے ہیں کہ وجوبِ قراء ت کا پتا دینے والی احادیث اس آیت کی معارض ہیں،لہٰذا ہم انھیں نہیں مانتے۔ فریقِ اول اس کا یہ جواب دیتا ہے کہ اول تو یہ آیت ہی اصولِ فقہ کی بعض کتب میں مذکور اصول کی روسے محکم نہیں،بلکہ آیتِ سورت مزمل کے معارض ہونے کی وجہ سے ہر دو ہی ساقط الاحتجاج ہیں تو پھر احادیثِ وجوب اس آیت کی معارض کیسے ہوئیں ؟ معارضہ تو تب ہوتا ہے جب یہ آیت خود محکم رہتی،جب کہ یہاں تو اس کے منسوخ ہونے کا احتمال پیدا ہوگیا ہے،جیسا کہ کچھ تفصیل ذکر کی گئی ہے۔[1] اس آیت کو قطعی طور پر محکم ماننے کی صورت میں بھی حال یہ ہے کہ وجوبِ قراء تِ فاتحہ کی احادیث اس آیت کی معارض نہیں بنتیں،بلکہ اس آیت میں وارد عام حکم سے سورت فاتحہ کو مخصوص کرنے والی ہیں۔قرآن میں وارد کسی عام حکم میں سے حدیث کے ساتھ کسی جزو کو خاص کرنا جائز ہے،جسے تخصیص الکتاب بالسنہ کہا جا تا ہے اور بالخصوص اگر کوئی متواتر حدیث ہو تو اس سے بلا اختلاف زیادت علیٰ کتاب اﷲ