|
دُعائے استفتاح یا ثنا کا حکم
جب نمازی قیام کی حالت میں رفع یدین اور تکبیرِ تحریمہ سے فارغ ہو جائے تو دعائے استفتاح یا ثنا پڑھی جاتی ہے۔ نبیِ اکرم صلی اللہ علیہ وسلم نے درست طریقے سے نماز نہ پڑھنے والے صحابی کو اس کی بھی تعلیم فرمائی تھی۔
چنانچہ سنن ابی داود اور مستدرک حاکم میں ارشادِ نبوی صلی اللہ علیہ وسلم ہے:
’’لوگوں میں سے کسی کی نماز پوری نہیں ہوتی، یہاں تک کہ وہ تکبیر ’’اَللّٰہُ اَکْبَرُ‘‘ کہے اور اللہ عزوجل کی حمد و ثنا بیان کرے اور قرآن میں سے جو میسر ہو پڑھے۔‘‘[1]
دعائے استفتاح یا ثنا کے مندوب و مسنون ہونے کے بارے میں حافظ ابن حجر نے ’’فتح الباري‘‘ میں اور سید سابق نے ’’فقہ السنۃ‘‘ میں صراحت کی ہے، جبکہ ’’المغنی‘‘ میں امام ابنِ قدامہ نے لکھا ہے:
’’اکثر اہلِ علم کے بقول دعائے استفتاح یا ثنا نماز کی سنتوں میں سے ہے۔‘‘[2]
یہی امام ابنِ تیمیہ نے اپنے فتاویٰ میں کہا ہے۔[3] امام مالک تو اس کے قائل ہی نہیں تھے، بلکہ تکبیر کے بعد قراء ت ہی شروع کر دیتے تھے۔[4]
|