حمید الدین فراہی رحمہ اللہ اور جمہور کےاصول تفسیر تحقیقی و تقابلی مطالعہ

تفسیر بالماثور

’اثر ‘ کی لغوی تعریف

’اثر ‘ کا لغوی معنیٰ بقیہ شے ہے۔خَرَجْتُ فِي إِثْرِه وأَثَرِه یعنی میں اسکے پیچھے نکلا،’اثر‘ خبر کو کہتے ہیں جسکی جمع آثار ہے۔[1] ’اثر‘ کے معنیٰ نقشِ قدم پر چلنے اور گزری بات نقل کرنے کے بھی ہیں۔[2] فرمانِ باری ہے:﴿ائْتُونِي بِكِتَابٍ مِنْ قَبْلِ هَذَا أَوْ أَثَارَةٍ مِنْ عِلْمٍ﴾[3] کہ اس سے پہلے آئی ہوئی کوئی کتاب یا علم کا کوئی بقیہ(ان عقائد کے ثبوت میں)تمہارے پاس ہو تو وہی لے آؤ۔

اصطلاحی تعریف

محمد عبد العظیم زرقانی رحمہ اللہ لکھتے ہیں:

"هو ما جاء في القرآن أو السّنة أوکلام الصحابة بیانًا لمراد اللّٰه تعالىٰ من کتابه"[4]

کہ قرآن کریم،سنت رسول اورکلامِ صحابہ میں موجود کتاب اللہ کی توضیح وتشریح تفسیر بالماثور کہلاتی ہے۔

محمد علی صابونی رحمہ اللہ فرماتےہیں:

"هو ما جاء في القرآن أو السّنة أو کلام الصحابة بیانًا لمراد اللّٰه تعالى،فالتفسیر المأثور إما أن یکون تفسیر القرآن بالقرآن أو تفسیر القرآن بالسّنة النبوية أو تفسیر القرآ ن بالمأثور عن الصحابة"[5]

کہ جوتفسیر قرآن،سنت یا کلامِ صحابہ سے ثابت ہو،یعنی تفسیر بالماثور یا تو تفسیر القرآن بالقر آن ہوگی،یا تفسیر بالحدیث ہوگی یا صحابہ سے منقول اقوال پر مبنی تفسیر ہوگی۔

ڈاکٹر مناع القطان رحمہ اللہ لکھتے ہیں:

"هو الّذی یعتمد على صحیح المنقول بالمراتب التي ذکرت سابقا في شروط التفسیر من تفسیر القرآن بالقرآن أو بالسّنة لأنها جاءت مبینة لکتاب اللّٰه أو بما روي عن الصحابة لأنّهم أعلم الناس بکتاب اللّٰه أو بما قاله کبار التّابعین لأنهم تلقّوا ذلك غالبًا عن الصّحابة"[6]