|
بیمہ کمپنیاں اور بیت المال کا موازنہ
بیمہ کمپنیوں کے ایجنٹ عموماً یہ دھوکا دینے کی کوشش کرتے ہیں کہ بیمہ کمپنیاں بھی اسلامی بیت المال کی طرح مصیبت کی گھڑیوں میں مدد اور تعاون کا بہترین ذریعہ ثابت ہوتی ہیں حالانکہ بیمہ کمپنیوں اور نام نہاد سماجی تحفظ دینے والے اداروں کی کار کردگی اور اسلامی بیت المال کا جائزہ لیا جائے تو سارے اسرار ورموز کھل کر سامنے آجاتے ہیں۔
1۔بیمہ کمپنی صرف اس شخص کی امداد کرتی ہے جو بیمہ دار ہو اور اس کی اقساط ادا کرتا رہے عام لوگوں سے اس کا کچھ تعلق ہوتا ہے جبکہ بیت المال ہر مصیبت زدہ اور پریشان حال کی مدد کرتا ہے خواہ اس نے عمر بھر بیت المال میں ایک پیسہ بھی جمع نہ کرایا ہو یا وہ جمع کرانے کے قابل ہی نہ ہو۔
2۔بیمہ کمپنی کے بیمہ دار امیر طبقہ کے لوگ ہوتے ہیں یا پھر متوسط طبقہ کے جو کچھ بچت کر سکتے ہوں اور وقت آنے پر یہی لوگ بیمہ کمپنی سے فائدہ بھی اٹھاتے ہیں جبکہ بیت المال سے فیض یاب ہونے والا بالعموم غریب طبقہ ہوتا ہے۔
3۔بیمہ کمپنی ایک خالص سودی کاروباری ادارہ ہے اور صرف منافع کے حصول کے لیے یہ دھندا کرتا ہے باہمی ہمدردی اور تعاون ایک ڈھونگ ہے وہ جمع شدہ رقوم کے سود سے کچھ حصہ بیمہ داروں کی نذر کرتا ہے باقی سب کچھ اس کا اپنا ہوتا ہے اس کاروبار میں اپنا منافع کتنا ہوتا ہے اس کا اندازہ اس بات سے لگائیے کہ 1979ء میں امریکہ کی بیمہ کمپنیوں کو اپنے بیمہ اداروں سے 197/ارب ڈالر کی رقم وصول ہوئی اور اس رقم میں سے صرف 4/ارب ڈالر اپنے بیمہ داروں کو ادا کئے،اس طرح اربوں ڈالر کی رقم اپنے پاس جمع کر لی۔[1]
|