|
تیسرا شاہد: حدیث حضرت ابوموسیٰ الاشعری رضی اللہ عنہ :
امام البانی رحمہ اللہ رقم طراز ہیں:
حضرت ابوموسیٰ اشعری رضی اللہ عنہ کی حدیث ابن لہیعہ عن الزبیر بن سلیم، عن الضحاک بن عبد الرحمن، عن أبیہ، قال: سمعت أبا موسی عن النبی صلي اللّٰه عليه وسلمسے بعینہٖ روایت کرتے ہیں۔
امام ابن ماجہ (۱۳۹۰)، امام ابن ابی عاصم رحمہ اللہ اور امام لالکائی رحمہ اللہ نے اس کی تخریج کی ہے۔
میں کہتا ہوں: یہ سند ابن لہیعہ کی وجہ سے ضعیف ہے۔ عبدالرحمن بن عزرب، جو ضحاک کا والد ہے، مجہول ہے۔ ابن لہیعہ سے روایت کرنے میں امام ابن ماجہ نے اسے ساقط الاعتبار قرار دیا ہے۔‘‘ [السلسلۃ الصحیحۃ، ج:۳، ص:۱۳۶]
یہ حدیث سنن ابن ماجہ کے علاوہ السنۃ لابن أبي عاصم (ج:۱، ص:۲۲۳، حدیث: ۵۱۰۔ فضائل الأوقات للبیہقي، ص:۱۳۲، رقم: ۲۹۔ شرح أصول اعتقاد أہل السنۃ للالکائي، ج:۳، ص:۴۴۷، حدیث: ۷۶۳۔ العلل المتناہیۃ لابن الجوزی، ج:۲، ص:۷۱، حدیث: ۹۲۲۔ تہذیب الکمال للمزی، ج:۶، ص:۲۷۷۔ ۲۷۸، ترجمۃ: الزبیر بن سلیم) وغیرہ میں ہے۔
حضرت عبداللہ بن عمرو رضی اللہ عنہ کی حدیث کی طرح حضرت ابوموسیٰ اشعری رضی اللہ عنہ کی حدیث کے مرکزی راوی بھی ابن لہیعہ ہیں۔ ہم اوپر ضروری تفصیل عرض کر آئے ہیں کہ ابن لہیعہ سییء الحفظ کی جرح کے ساتھ ساتھ سماعِ حدیث میں تساہل کی جرح سے بھی مجروح ہیں۔ اسی لیے اس سند میں بھی اختلاف واقع ہوا ہے۔
|